تونس.. ارقد لا يجيك الغول ياكلك

ما ننساش وقتلي كنت صغير و كنت ما نركحش ونطير هنا نطير غادي.. الحاصيلو نقول للبلاء اهبط ولا خلي نهبط.. و في الليل ما نرقدش بالطبيعة و امي تبدا ضالك تلحلح بيا و تحاول.. شي النافع ربي.. و بعد ترمي هاك الكلمة.. ارقد راهو الغول باش يجي ياكلك.. نولي وقتها نركش بحذاها خايف من الغول اللي باش يجي ياكلني كان نبقى على راحتي ندور و نحوس.. مالا يلزم نشد جنب امي اللي هي اكبر مني و تفهم خير مني و باش تدافع علي كونتر الغول اللي باش يجي ياكلني.. عاد امي عمرها لا دخلت مدرسة و لا تعرف تكتب اسمها ولا قرت علم النفس.. مالا كيفاش طلعتها حكاية الغول هاذي اللي غلبتني بيها صغري كامل.. ديما كنت نسأل في السؤال هاذا اما ما عرفتش الجواب متاعو كان ها النهارين هاضم.. امي طلعت راضعة السياسة في الحليب..اي نعم عندها موهبة سياسية ملي ولدت.. قلي كيفاش طلعتها.. عاد يا سيدي ماهم النساء الديمقراطيات و الاحزاب الديموقراطية برشا و اللي ما عندهم حتى بروقرام كان ايجا اركش بحذانا باش نحموك من حركة النهضة.. الغول اللي باش ياكلك و انتا ما تعرفوش نحنا اللي نعرفوه و نحنا هوما اللي باش نحموك منو.. ايجا اركش عيش وليدي مازلت صغير و رد بالك لا تدور وحدك اللا ما نبدو نحنا بحذاك.. ايجا انت ارقد و خلينا نحنا نتصرفو آش عليك.. عاد دورتها في مخي الحكاية و قلت ها اللعبة هاذي ما ثمة حد يقدها قد امي.. وليت قررت باش نمشي للحبيب الصيد و نطلب رخصة في حزب سياسي لامي.. انتخبونا ولا.. الغوووول.. هع هع هع.. هاذي السياسة ولا لوح..