بعد الصدمة.. خلينا نحللوا اش قال بعقلانية و من غير عواطف وحماس...

الراجحي حكى على 3 نقاط:

قال إلي ثمة حكومة ضل بقيادة كمال الطيف وتصور إلي السواحلية ما همش باش يسلمو في الحكم وتنبأ إلي الجيش باش يسيطر على الحكم كان النهضة تربح..

مالا خلينا نخذوهم حبة حبة..

- قال إلي السواحلية شادين الحكم وما همش باش يسلمو فيه وهذي طزة كبيرة منو.. تبين إلي هو ما عندوش الحنكة السياسية وهي الكلمة الصحيحة الوحيدة إلي قالها فيه كمال اللطيف في وسط الكذب والنفاق إلي قالو الكل من الصباح.. خاطر مش وقت جهويات ومش كلمة تتقال هذيكة حتى لو كان ما يقصدهاش..

-تنبأ إلي الجيش باش يقلب الحكم كان حركة النهضة تربح وهذي حكاية حسب رايي حولة لعدة أسباب: أولاً الجيش في تونس مستحيل يعمل إنقلاب على خاطر لا عندو الإمكانيات باش يسيطر على بلاد كاملة كيف جيش دزاير ولا مصر ولا عمرو عمل إنقلاب في تونس ولا صار حكم عسكري عكس سورية ومصر ودزاير إلي ملي استقلوا يحكموا فيهم لعسكر لتو..وزيد لا الظروف الدولية باش توافقلو على إنقلاب وحكم عسكري عكس إرادة الشعب وخاصةً إذا الشعب تحرك.. والجيش يعرف هذا بالباهي وجاتو فرصة باش يحكم وما حكمش على خاطر يعرف هذا الكل رغم إلي الشعب وقتها معاه خلي الشعب يجي ضدو.. وأهم حاجة مستحيل حتى حزب.. النهضة ولا غيروا.. ينجم يجيب أغلبية كبيرة في الإنتخابات الجاية على خاطر القانون الإنتخابي إلي عملوه يخلي ناس لكل تقريب في المجلس التأسيسي.. وكان تعملوا حسبة بالقانون الإنتخابي هذا تو تلقوا كان توصل النهضة تجيب 45-50 بالميا (وهذا صعيب) ما تدخل كان ب-27-29 بالميا للمجلس التأسيسي معناها ما ثماش أغلبية لحتى حد في المجلس..

- قال زادة إلي ثمة حكومة ضل في تونس تسير في البلاد بقيادة كمال اللطيف وهذي ما زادتنا في الحقيقة كان التفصيل متاع الإسم أما الحكاية في العموم تكاد تكون معلومة وضاهرة للشعب.. تشوف ديجا ديمة ثمة قرارات ضد إرادة الشعب واندرا كيفاش معمولين كما تعين الولات والمعتمدين وحكاية العركة إلي تعملت على 10 ولا 23 سنة وهذي هي الغريبة التكبيشة متاع السبسي في حكاية ال-10 وخلتنا نتساألو على شكون يأثر على القرارات وثمة شكون قال المبزع وثمة شكون قال المبزع أضعف من انو ياخذ قرارات جملة لين الراجحي جاوبنا على سؤال.. لكن تتصور زعمة درجة التأثير متاع كمال اللطيف توصل لكونو عامل الحكومة ماريونات.. بصراحة صعيب تجد الحكاية هاذية.. صحيح عندهم بوفوار وتأثير أما حكم من وراء الستار نتصور صعيب برشة..